Цените на акциите денеска паднаа на азиските берзи, бидејќи Вашингтон најави нови царини и стана се појасно дека американската централна банка нема да брза со дополнително намалување на каматните стапки. Индексот MSCI на азиските акции беше во минус за околу 1 отсто во 7 часот наутро.
Јапонскиот индекс Nikkei падна за 1,4 отсто, додека цените на акциите во Шангај, Јужна Кореја, Австралија и Хонгконг паднаа меѓу 0,1 и 1,2 отсто.
Падот на индексот е резултат на стравувањата на инвеститорите од трговска војна, откако американскиот претседател Доналд Трамп најави зголемување на царините за увоз на автомобили, фармацевтски производи и полупроводници.
Инвеститорите стравуваат дека Кина и Европската Унија, меѓу другите, ќе возвратат со зголемување на царините, што може да ја ослаби меѓународната трговија. А тоа, пак, може да предизвика забавување на глобалниот економски раст.
ФЕД најверојатно нема да ги намали каматните стапки
Лошото расположение на пазарите е последица и на избледените надежи дека американската централна банка наскоро ќе продолжи да ги намалува каматните стапки.
Вчера беше објавен записникот од последната средба на лидерите на централните банки на САД, кога тие ги оставија каматните стапки непроменети поради високата инфлација.
Записниците покажаа дека лидерите на ФЕД се загрижени за зголемената инфлација и можното влијание на политиките на Трамп, особено тарифите, врз нивните напори да ја спуштат инфлацијата на целните нивоа.
А тоа значи дека ФЕД најверојатно нема да продолжи да ги намалува каматните стапки во скоро време.
Зајакнува доларот, цената на нафтата паѓа
А на валутните пазари вредноста на доларот во однос на кошницата валути благо се зголеми.
Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 107,07 поени, додека вчера во овој момент изнесуваше 106,94 поени.
Курсот на доларот во однос на јапонската валута се лизна од вчерашните 151,70 на 150,40 јени.
Сепак, американската валута зајакна во однос на европската, па цената на еврото се лизна на 1,0430 долари, додека вчера во овој момент изнесуваше 1,0460 долари.
Цените на нафтата сепак паднаа. Цената на барелот на лондонскиот пазар утринава падна за 0,25 отсто, на 75,85 долари, додека на американскиот пазар барелот поевтини за 0,42 отсто, на 71,95 долари.
