Претседателот на Соединетите Американски Држави, Џо Бајден, истакна дека неговата земја и Германија се решени да го завршат процесот на интеграција на Западен Балкан во европските институции и на тој начин да постигнат целосна, слободна и мирна Европа, јавуваат агенциите.
Бајден во Вашингтон се сретна со германскиот канцелар Олаф Шолц, а по средбата истакна дека имале исклучително конструктивен разговор и додаде дека ќе продолжи да работи на зајакнување на алијансата и сеопфатното партнерство меѓу САД и Германија.
Бајден и Шолц посветија најмногу внимание на руската закана за Украина. Двајцата лидери рекоа дека бараат дипломатско решение за ситуацијата.
Една од темите на средбата беше и Западен Балкан, за што Бајден зборуваше по средбата.
„Исто така, ја потврдивме нашата посветеност да ја завршиме работата за интегрирање на Западен Балкан во европските институции и конечно да постигнеме целовита Европа, слободна и во мир“, рече Бајден.
Тој понатаму рече дека САД и Германија се блиски пријатели и сојузници на различни меѓународни платформи и на билатерално ниво и дека не постои прашање од глобално значење во кое Германија и САД не работат заедно.
Германскиот канцелар Шолц изрази задоволство од првата посета на Вашингтон и додаде дека е добро што во овој тежок период имал можност да разговара со американскиот претседател Бајден.
Тој рече дека Германија, САД и сојузниците во НАТО не можат да молчат за заканите на Русија кон Украина, бидејќи акумулацијата на руски војници на украинската граница е безбедносна закана и за Европа.
