Седум лица загинаа, а повеќе од 53 се повредени во сообраќајна несреќа што се случи рано утринава во провинцијата Прачин Бури, југоисточен Тајланд, кога туристички автобус удри во задниот дел на камион додека се движеше по надолнина.
Полицијата и спасувачите тврдат дека откажале сопирачките на автобусот, поради што возачот изгубил контрола, објави локалниот весник „Таират“.
Несреќата се случила утринава околу 2 часот по полноќ, кога автобусот се спуштал надолу од ридот Сала Пу Тон.
Според првичните информации, возилото изгубило контрола бидејќи му откажале сопирачките и удрило во приколка на камион.
Во моментот на судирот автобусот налетал на уште два камиони кои превезувале брашно, по што избувнал пожар.
Во пожарот четири лица загинаа на горниот кат од автобусот, додека три загинаа на долниот кат.
По повеќе од 30 минути гаснење на пожарот, спасувачите успеале да ги извлечат телата на загинатите и повредените патници.
