Авион на „Визер“ што летал на линијата Крајова-Лондон утринава слетал на аеродромот во Будимпешта поради чад кој навлегол во патничката кабина, а двајца членови на екипажот се пожалиле дека не се чувствуваат добро.
Авионот утрово полетал од Крајова, Романија и бил во унгарскиот воздушен простор кога екипажот решил да го прекине патувањето бидејќи чад навлегол во патничката кабина преку системот за климатизација, објави веб-страницата Air portal.hu.
Авионот утрово околу 06 часот безбедно слета на пистата на меѓународниот аеродром „Ференц Лист“ во Будимпешта, а околу 10 часот го продолжи летот за Лондон откако ги смени авионот и екипажот.
Во авионот имало 180 патници и шест членови на екипажот. Авионот Ербас А320 стар 12,5 години е еден од најстарите во флотата на Визер.
