З.Х.

Најмалку осум лица загинаа, а 27 се повредени во експлозија што денеска избувна пред влезот на универзитет во главниот град на Авганистан, Кабул.

Меѓу повредените има и студенти кои чекале да одат на испит. Првичната информација беше дека загинати се шестмина, но во меѓувреме бројот на жртви се зголеми на осум, пренесе агенцијата „Анадолу“.

Локалната полиција соопшти дека специјални единици откриле и уништиле и втора бомба која била поставена во близина на местото на експлозијата.

Досега ниту една група нема преземено одговорност за нападот.

Велика Британија објави дека танкерот што денеска го запленила иранската војска не половел под британско знаме.

-Колку што знаеме, нема британски интереси на тој брод, изјави портпарол на британската влада, а пренесе „Ројтерс“.

Иранската револуционерна гарда во Персискиот Залив заплени странски танкер со 12 членови на екипажот поради наводно шверцување на нафта.

Иранската државна телевизија објави дека танкерот бил пресретнат јужно од иранскиот остров Ларак, пренесе агенцијата АП.

Како што тврди иранската телевизија, танкерот шверцувал нафта која иранските шверцери ја продавале на странски клиенти.

Во извештајот не е наведено на која земја и припаѓа на танкерот, ниту чии државјани се членовите на екипажот.

Веста за запленување на танкерот доаѓа во време на зголемени тензии меѓу Иран и западните сили.

Украина и Русија се согласија околу размената на затвореници. Размената ќе вклучи вкупно 277 лица притворени во конфликтот во источна Украина, објави висок украински официјален претставник, пренесе Ројтерс.

Роман Бесмртниј рече дека Киев го очекува размена на 208 лица кои отслужуваат затворска казна во Украина за 69 Украинци.

Тој ја претставува Украина во работната група за политички прашања на Трилатералната контакт група, тело кое тежнее кон дипломатско решение за конфликтот во источниот дел на Украина. Освен Киев и Москва, во групата седат и претставници на Организацијата за безбедност и соработка на Европа (ОБСЕ).

Размената е договорена во белорускиот главен град Минск по трилатералните разговори.

Бесмртниј не го специфицираше датумот кога ќе се спроведе размената, но постапката може да трае неколку месеци.

Украинските сили се борат со проруските сепаратисти на источниот дел на земјата од 2014 година, а повеќе од 13.000 луѓе се убиени во судирите. И покрај примирјето и понатаму се случуваат конфликти.

Во минатата размена на затвореници, спроведена во декември 2017 година, Украина предаде околу триста луѓе во замена за 70.

Јавното задолжување во Велика Британија би можело да се удвои доколку излезе од ЕУ без договор, тврди британската Канцеларија за буџетска одговорност (ОБР).

Во случај на Брегзит без договор, јавниот долг може да се зголеми на 60 милијарди фунти, а ако земјата излезе од ЕУ со договор, оваа бројка би изнесувала 29,3 милијарди фунти.

ОБР, кој е основан за да прави независна анализа на британските јавни финансии, во првата проценка за сценариото со излез без договор, се послужи со анализа на ММФ според која британската економија ќе ослаби за 2 проценти во 2020 година, за да закрепне во 2021 година.

Ова ќе се следува по воведувањето на тарифата од 4 отсто за производи од ЕУ.

– Зголемената несигурност и намалената доверба ќе нанесат штета на инвестициите, додека „трговските бариери дополнително ќе го отежнат извозот“, се вели во извештајот на ОБР.

– Овие два фактори заедно ја водат Велика Британија во рецесија, при што цената на имотот и вредноста на фунтата значително ќе паднат, се додава во текстот.

Тука се и ризикот од инфлација и зголемување на задолженоста на јавниот сектор за 12 проценти до 2024 година.

ОБР додава дека ова не е најверојатно сценарио, ниту најлошо можно сценарио, и оти двајцата конзервативни кандидати за премиер нудат предлози кои „ќе ја зголемат владината задолженост за десетици милијарди фунти“.

Топлотниот бран кој оваа недела го зафати Израел во средата го достигна врвот во Содом, кај Мртво Море кога биле измерени 49,9 степени Целзиусови.

„Тоа е највисока температура што некогаш е измерена од основањето на државата во 1948 година и втора највисока некогаш забележана во тоа подрачје откако е почнато бележење на временските прилики во 20-ите години“, соопштти израелската метеорлошка служба.

Највисоката температура била измерена во 1942 година – 54 степени во комуната Тирта Цви на северот на Долината Јордан.

„Иако екстремни температури биле измерени и во неодамнешното минато, новиот рекорд покажува дека глобалните климатски промени и затоплувањето влијаеле на просечните температури“, објави Метеролошката служба.

Од таму навеле дека се очекува затоплувањето да продолжи и дека ќе има екстремни топлотни бранови и нови рекордни високи температури.

Екстремно топло време по должината на брегот на Средоземното Море е ретко и се случува еднаш во пет до десет години, но во последната деценија станува сè почесто на секои две до три години.

Основачот на Викиликс Џулијан Асанж ја повлече жалбата на неговата затворска казна во траење од 50 недели поради кршење на условите за привремено пуштање на слобода во Велика Британија.

Судски претставници соопштија дека е откажано сослушувањето, кое било закажано за следната недела.

Асанж служи казна од 50 недели во Велика Британија поради кршење на кауција, откако седум години помина во Амбасадата на Еквадор во Лондон, за да избегне екстрадиција во Шведска поради наводно силување.

Асанж во февруари следната година го очекува сослушување на кое ќе биде одлучено дали ќе биде екстрадиран во САД, каде е обвинет за наводен обид да разбие владини шифри и кршење на законот за шпионажа.

Во силна експлозија на гас во Крајстчрч во Нов Зеланд, каде што пред четири месеци имаше смртоносни напади во две џамии, повредени се шест лица, а десетици жители се евакуирани од своите домови.

Експлозијата е почувствувана и на неколку километри од инцидентот, а првично луѓето мислеле дека станува збор за земјотрес или експлозија на бомба, пренесува агенцијата АП.

Властите соопштија дека станува збор за експлозија на гас, а истрагата е во тек.

Според полицијата, експлозијата претствува сериозен инцидент, пренесе „Ројтерс“.

Во две џамии во Крајстчрч пред четири месеци напаѓач уби 51 лице и рани десетици.