Карло Анчелоти стана првиот италијански тренер кој освои титула во шпанскиот Суперкуп, бидејќи неговиот Реал Мадрид вчера го победи Атлетик Билбао во големото финале во Ријад.
„Кралевите“ победија со 2:0 во натпревар кој на крајот можеше да биде навистина неизвесен, но такво нешто спречи Тибо Куртоа кој бравурозно интервенираше во 88-та минута и на фантастичен начин го одбрани пеналот на искусниот Гарсија.
Со оваа одбрана, Куртоа стави точка на финалето и Реал победи со 2:0 во натпревар во кој имаше огромен посед, нешто што беше сосема различно од полуфиналето кога тимот на Анчелоти ја победи Барселона.
Италијанскиот стручњак не е голем љубител на неефектниот посед на топката и многу повеќе ужива во директна игра и добра транзиција на неговиот тим, па затоа им открил на новинарите дека бил позадоволен од играта во полуфиналето против Барселона.
– Сметам дека денеска имавме преголем посед на топката…, – иронично порачал Анчелоти и додал.
– Овојпат направивме многу поразлични работи од мечот со Барселона. Играта беше сосема поразлична, но докажавме дека сме заслужени победници. Куртоа спречи луди 10 минути со својата одбрана и секако дека се согласувам со Перез. Тибо и Модриќ се најдобри светски играчи на својата позиција, – изјавил Карло.
