СДСМ: Земјоделците да аплицираат за мерките што им се на располагање

Земјоделците да аплицираат за мерките што им се на располагање, порачуваат од владејачкиот СДСМ преку соопштение.

Оттука нагласуваат дека иако Министерството за земјоделство, шумарство и водостопанство, со техничката Влада добило дополнителен заменик-министер за овој ресор, спроведувањето на мерките за финансиска поддршка во земјоделството и руралниот развој продолжува без никакви пречки.

Тоа значи дека и во следниот период Агенцијата за финансиска поддршка во земјоделството и руралниот развој продолжува со планот и програмата за финансиска поддршка на земјоделството и руралниот развој за 2019 година, односно исплатата на субвенциите продолжува според календарот за исплата.

„Земјоделците можат да бидат спокојни, нема поништување на објавените јавни повици за давање на државно земјоделско земјиште под закуп. Тие сè уште можат, заклучно до 22 овој месец, да аплицираат на четири вакви активни јавни повици“, велат од СДСМ.

Непречено и согласно динамиката, како што додаваат од партијата, продолжува и реализацијата на инвестициите во водостопанската инфраструктура. Тоа се изградбата на брани и современи системи за наводнување, малите еколошки системи за наводнување и други инвестиции во водостопанството кои ќе овозможат наводнување на нови над 28 илјади хектари земјоделска обработлива површина.

„СДСМ за само две и пол години покажа што значи вистинска грижа за земјоделството и земјоделците. Потврда за тоа се навремените и неселективни субвенции, исплатата на наследените долгови кон земјоделците, бројните мерки како зелената нафта, млад земјоделец, поддршката на жените земјоделки, навремен откуп и исплата на земјоделските производи и искористеноста на средствата од националната програма за поддршка во земјоделството и руралниот развој има реализација од 100 проценти“, велат од СДСМ.

Од партијата оценуваат и дека 2019 година е историска година во која државата, предводена од СДСМ за првпат не плаќа пенали за неискористување на европските средства преку ИПАРД-програмата.

InterServer Web Hosting and VPS