Веќе се спремни 9 од 11 предмети кои за многу брзо ќе се достават во Финансиска полиција – откри во емисијата „Бизнис 21“ директорот на Фондот за иновации Никола Додов, кој потенцираше дека ревизијата открила многу злоупотреби на парите наменети за иновации. Кај над 80 компании се откриени неправилности. Фондот имал ангажирано 591 домашен експерт – од нив под истрага се седумдесетина, како и 8 странски експерти од Комитетот кои одлучуваат кој ќе добие пари од Фондот. Меѓу нив е и Гунтер Ферлингер, познат во јавноста по барањето санкции од страна на ЕУ за Македонија.
„Он и некои други членови од Комитетот исто така се под истрага. Во делот на истрагата и тие се опфатени заедно со стручните лица. До сега јас околу седумдесетина луѓе имаме сомневање. Седум, а најверојатно ќе бидат 8 странски во брзо време. По тоа што го имам прочитано и тоа што го имам видено што значи лично јас се договарани и преговарани начините кој и како да добие, која компанија да добие и што да добие.“, рече Никола Додов, директор на ФИТР.
Додов откри дека ги прекинал договорите на 40 хонорарци со хонорари од 1.000 евра кои ги затекнал дека не доаѓаат на работа, или доаѓаат на кратко.
Владата сè уште нема одлука дали Фондот ќе се укине или ќе се припои кон друга државна институција. Но директорот вели:
„Ваков скандалозен Фонд, ајде да кажам како до сега, навистина треба да не постои“, изјави Додов.
Фондот вкупно должи околу 15 милиoни евра на стартапите до крај на проектите. А за 12 години преку Фондот се исплатени 82 милиони евра на приватни компании.
