Mакедонскиот виртуоз Симон Трпчески вечерва со почеток во 20 часот на платото пред Националната опера и балет заедно со Пријателите, ќе ја почести публиката со бесплатен концерт – неговиот уникатен музички проект „Македонисимо”.
Пет години откако ја имаше својата светска премиера, „Македонисимо” конечно ќе ја има премиерата и пред својата домашна публика.
„Почувствувајте ја магијата што го освои светот! МАКЕДОНИСИМО си доаѓа дома! Повелете на 14 септември на платото пред Националната опера и балет на бесплатниот концерт што Ви е посветен Вам”, реномираниот пијанист ја покани публиката преку објава на социјалните мрежи.
Претходно тој објави и дел од атмосферата од претпремиерата која се одржа во селото Збажди на планината Караорман, кое е воедно и родното место на неговиот татко. Трпчески најавува спектакл, а предвидено е концертот да трае 90 минути.
„Македонисимо” претставува спој на македонската народна музика со џезот и класичната музика, сплет од 23 нумери, најмногу ора и по некоја песна. Трпчески го создаде во соработка со композиторот Панде Шахов, а го изведува со Александар Краповски (виолина), Александар Сомов (виолончело), Хидан Мамудов (кларинет, саксофон и кавал) и Влатко Нушев (удиралки).
По вечерашниот концерт во Скопје, „Македонисимо” патува во Штип на 24 септември и ден подоцна во Битола.
„Македонисимо” во последниве пет години пропатува низ десетина земји и забележа огромен успех.