Родители на деца со попреченост го кренаа својот глас и бараат конечно да се реши нивниот статус, бидејќи повеќето од нив се принудени да се откажат од својата работа и да заработуваат, затоа што нема кој да се грижи за нивните деца.
Посветени на своите чеда 24 часа дневно, тие алармираат за својата ситуација, и бараат да се донесат промени, односно да добијат статус родител – негувател. Веќе е започната и онлајн петиција, чиј иницијатор е Анче Туфекчиева од Струмица, мајка на Верче која е девојче со Даунов синдром, и претседателка на здружението ,,Вера”.
Како што наведува Туфекчиева во петицијата, околу 200.000 семејства во земјава, кои имаат дете со попреченост, се херои кои системот секојдневно ги гази. Родителите кои биле принудени да се откажат од работата за да можат да ги чуваат своите деца, немаат осигурување, ниту пак плата, а не им следувала ниту пензија.
Поради тоа, Анче поддржана од родители на деца со попреченост, бара рамноправност, односно стаtус на родител – негувател за овие родители.
-Во нашата земја мајката /таткото на дете со попреченост не се признаени со закон. Ни треба закон за родител – негувател!
Ние не сме згрижувачи, ние сме биолошки родители кои ги негуваат своите деца со попреченост 24 часа на ден, со години, со децении… без плата, без осигурување, без пензија… Многу од родителите не можат да работат затоа што нема кој да го гледа детето.
Не можеме да одиме на лекар, не можеме дури и да легнеме кога ќе се разболиме, не можеме ни да одиме на вечера со пријатели ако нема кој да се грижи за нашето дете. И секоја чест на секој згрижувач на дете со попреченост, им се поклонувам до земја.. Но дали мислите дека и ние не треба да сме подеднакво исти и рамноправни како биолошки родители. Но, ние си молчиме, бидејќи немаме време да викаме затоа што секојдневната борба ни е поважна од било што, појаснува Туфекчиева во петицијата.
Додава дека е време да се слушне нивниот глас, бидејќи онаму каде што се носеле одлуките за овие деца и нивните семејства, одамна немало хуманост.
-И гледајќи што секојдневно ни се случува и дека хуманоста веќе оддамна ја нема таму каде што се носат одлуките, мислам дека е време да го кренеме нашиот глас.
И не, оваа приказна не е само за мене и Верче и за нашето семејство оваа приказна е секојдневие на повеќе од 200.000 семејства во нашата држава, а да не зборуваме за Мајките со попреченост кои покрај својата попреченост подариле живот и нив никаде ги нема.
Нашите семејства не се социјални случаи, нашите семејства се херои кои секојдневно системот ги гази! Мислам дека е време да се организираме и да добиеме статус на родител – негувател!
Можеби ќе ни биде потребно многу време но да го направиме тоа за секое семејство на лице со попреченост! Да го направиме тоа за идните генерации! Очекуваме поддршка од сите, порачува храбрата мајка.
Петицијата веќе се потпишува, а граѓани кои ја потпишале ги споделуваат своите искуства на темата. Раскажуваат дека откако им се родило дете со попреченост, се откажале од својата професија и се посветиле на детето, затоа што во земјава нема доволно дневни центри каде ќе може да престојува додека тие се на работа, а нема ниту доволно стручни кадри за овие лица на кои им е потребна нега и грижа 24 часа дневно.
-Државата ни го отежнува и така претешкиот живот! Недоволно сме поддржани од институциите и носиме тешко бреме. Освен грижата како да го преживееме месецот, тука е и огромниот страв од иднината, како понатаму, кога ќе немаме ниту пензија? – прашуваат родителите.
Дел од нив додаваат дека со многу работи во државата се доцни, но веруваат дека кренатиот глас ќе допре до надлежните институции и ќе има надеж за промени.
Оние кои сакаат да ги поддржат родителите во оваа борба, можат да ја потпишат петицијата на следниот линк:
https://www.peticijaonline.com/484865?fbclid=IwY2xjawKC3KZleHRuA2FlbQIxMQBicmlkETFRaURySEhlV21BTWFqdHlUAR4lHQHYQ-DL7Yn2myxThCU0qEuHpWGq9krbN5OPl5M2-40qs_MaO1zpJFQXDA_aem_ZLzY6d9iUU0OsTGJ6A7gAQ
