Словенечкиот премиер Јанез Јанша ја осуди одлуката на Русија да ги признае украинските сепаратистички региони Доњецк и Луганск и повика Европската Унија да ѝ понуди на Украина „перспектива за полноправно членство“.
„Руското признавање на двете украински сепаратистички територии е јасно прекршување на меѓународното право и на договорите од Будимпешта и Минск. Словенија го осудува овој незаконски чин. ЕУ мора на Украина да ѝ понуди перспектива за полноправно членство“, напиша словенечкиот премиер на Твитер.
Јанша во понеделникот во Словенија имаше билатерална средба со унгарскиот премиер Виктор Орбан, по што двајцата повикаа на деескалација на конфликтот и политичко решение на кризата околу Украина.
По средбата со политички блискиот унгарски премиер, Јанша рече дека ескалацијата на конфликтот „не би имала победник“, особено поради сегашното ниво на развој на воената технологија и дека „секој што штрака со оружје“ треба да го знае тоа.
