Министерката за образование и наука Весна Јаневска побара да им бидат дадени неколку дена на институциите за решавање на случајот со малолетникот и бојкотирањето на наставата во ОУ „Лазо Ангеловски“. Таа предупреди дека на ваков начин се стигматизира детето во јавноста.
„Ве молам да дозволите неколку дена веќе работиме тимски. МОН, Министерството за здравство и Министерството за социјала, демографија и млади го решаваме проблемот. Дозволете неколку дена да дојдеме до најсоодветното решение. Предвидуваме подлабоки, посериозни активности и постапки коишто ќе бидат во корист на детето и решавањето на целиот случај, изјави Јаневска пред почетокот на свечената заклетва на новите членови на Мировниот корпус.
Таа нагласи дека нема понатаму да дискутира за ученикот.
„Неможе цела македонска јавност да го сигматизира детето. Дајте ни време, дајте ни извесен период, време ќе го решиме случајот, рече таа.
Од Министерството за образование и наука информираа дека е формирана интердисциплинарна комисија која треба да го разгледа случајот и да донесе мерки коишто ќе бидат во интерес и на ученикот и на сите инволвирани страни.
За случајот со новиот предизвик на ТикТок, Јаневска ги повика средношколците наместо тоа да се насочат на натпревари во образованието и науката.
