Динамо Загреб го испушти пласманот во плејофот за влез во Лигата на шампионите во судиското надополнување, па хрватскиот шампион долго ќе го памети финишот на гостувањето кај АЕК, кое и онака имаше посебна тензија поради смртта на навивач на грчкиот тим во инцидентот пред десетина дена.
Араухо во 92. минута намали на 1:2, резултат кој водеше во продолжение од 30 минути, за по истекот на предвиденото надополнување, судијата Ескас од Норвешка со помош на ВАР интервенцијата да процени дека имало пенал за домаќините.
Ливаковиќ го одбрани ударот на Гарсија, но на топката натрча хрватскиот интернационалец Домагој Вида и тој го испрати АЕК во следната рунда.
Хрватските медиуми утринава пренесуваат изјави на судии кои сакале да останат анонимни, а тврдат дека судијата направил голем превид и ги прекршил правилата, а еден од нив е и „Вечерњи лист“.
Во конкретниот случај, судијата предвиде пет минути надополнување, а отиде да ја проверува снимката во осмата минута. Тој отиде да прегледува и одлучи дека играњето со рака на Љубичиќ е за пенал, а според судиите, Ескас морал да ги предупреди играчите дека останува само да се изведе пеналот и дека нема да смета она што се случило по ударот од белата точка, односно по евентуалното одбивање на топката
Препорака за судиите е да ги информираат фудбалерите за ова правило и да побараат од нив да останат на центарот, иако тоа не е задолжително. Тоа се јасни правила поврзани со изведување пенал во ситуација кога најавеното надополнување е истечено, – пренесува „Вечерњи лист“.
