17.8 C
Skopje
Saturday, October 1, 2022

Флејтистот Матеј Јоакимеску од Романија настапува во Филхармонијата

Најчитани вести

Овој четврток, во 20 часот, оркестарот на Филхармонијата ќе одржи концерт насловен „Сеќавање на Б.Б.“, на кој како солист на флејта ќе настапи Матеј Јоакимеску од Романија, а диригент е маестро Габриел Бебешелеа. На програмата се дела од современата музика – за првпат ќе прозвучат „Кантус во сеќавање на Бенџамин Бритн“ од Арво Перт и Концертот за флејта и оркестар на Дојна Ротару, а светска премиера ќе доживее Концертот за алт-флејта и гудачи бр. 2 од финскиот композитор Калеви Ахо.
„Кантус во сеќавање на Бенџамин Бритн“ (1977) е композиција од естонскиот композитор Авро Перт, напишана по смртта на англискиот композитор Бенџамин Бритн.
Калеви Ахо (1949) е фински композитор, кој во своето творештво има дела напишани во различни стилови – од неокласицизам до модернизам и постмодернизам. Поради неговата „иронична“ употреба и мешањето на различни стилови и жанрови во музиката што ја пишува, го споредуваат со Густав Малер и Алфред Шнитке.
Дојна Ротару има уникатен и препознатлив стил, кој е изграден на архетипска естетика, која ги комбинира звуците и боите од романскиот фолклор.
Матеј Јоакимеску е еден од најпознатите романски флејтисти. Публиката и критиката ги оценуваат неговите настапи како „авантуристички и восхитувачки“.
Јоакимеску е дипломец на Универзитетот за музика и изведувачки уметности во Виена, во класата на проф. Барбара Гислер-Хасе. Добитник е на многу интернационални награди. Многу композитори пишуваат дела специјално за него, а едно од нив е и Концертот за алт-флејта и гудачи од Калеви Ахо, кој премиерно ќе прозвучи на вечерашниот концерт.

Матеј Јоакимеску е уметник што ги освојува нашите срца со својата силна енергија, со суптилниот израз и исклучителната сензитивност. Тој е многу талентиран и харизматичен музичар – вели за него композиторот Калеви Ахо.
Маестро Габриел Бебешелеа е шеф-диригент на оркестарот на Филхармонијата. Неговата музичка репутација брзо почнала да расте по воодушевувањата на критиката и публиката, за неговата исклучителна музикалност и ентузијазам со кои ги предводи оркестрите. Една од големите пасии на Бебешелеа е да работи со млади музички уметници. Од 2011 година, тој е главен диригент на Молдавскиот национален младински оркестар, а редовно работи и со Романскиот младински оркестар. Дипломира оркестарско диригирање во 2010 година со кум лауде, на Музичката академија во Клуж-Напока. Две години подоцна магистрира на Националниот музички универзитет во Букурешт, а потоа и докторира на истиот универзитет. Моментно живее во Виена, каде што ги заврши постдипломските студии на Универзитетот за музика и изведувачки уметности.

Повеќе вести

- Advertisement -spot_img

Најнови вести

WP2Social Auto Publish Powered By : XYZScripts.com