Транспаренси Интернешнл Македонија констатира постоење судир на интереси во постапувањата на Агенцијата за филм при распределба на средства по конкурс за краткометражни и долгометражни филмови од 2022 година. Износот на тие средства распределени за таа година изнесува преку 4 милиони и 200 илјади евра.
– Укажувањата за постоење судир на интереси се потврдија. Законот за филм изрично забранува проекти да поднесат лица коишто учествуваат во органите за избор или кои работат во Агенцијата. Ние утврдивме ситуација во која проекти поднеле две лица кои учествуваат во органите за одлучување, односно се рецензенти. Тие проекти биле повлечени дури откако Транспаренси Интернешнл започна постапка на мониторинг и анализа, информира претседателката на Транспаренси Интернешнл Слаѓана Тасева на денешната прес-конференција.
Прашањето е, додаде таа, како ќе се спроведеше оваа постапка доколку тие не се заинтересираа и дополнително како се спроведувале другите постапки претходно и дали имало и претходни вакви ситуации за кои никој не се заинтересирал.
– Постои незаконитост во постапката и очигледно постапување во судир на интереси. Втората ситуација на ризик од судир на интереси или на ризик за пристрасно одлучување е кога имаме две лица кои претходно биле разрешени од нивните функции по интервенција од лице коешто сега се јавува како учесник на конкурсот со сопствен проект и тие истите лица му се назначени да ја вршат рецензијата, односно да ја оценат финансиската оправданост на проектот. Ние имаме две ситуации на судири на интереси, кои по својата содржина и форма се различни, но се незаконити и ја загрозуваат легитимноста на постапката за доделување средства по овој конкурс. И затоа бараме овој конкурс да биде повторен, нагласи Тасева, додавајќи дека сите аргументи и елементи ги даваат на располагање на јавниот обвинител.
