Селекторот на репрезентацијата во кошарка на САД и тренер на Голден Стејт, Стив Кер, го објави списокот со 12 кошаркари кои ќе настапат на претстојното Светско првенство. Во списокот нема ниту една од суперѕвездите од НБА лигата.
Сепак, сè уште има четири членови на Ол Стар екипи, и тоа се Тајрес Халибартон (Индијана), Ентони Едвардс (Минесота), Брендон Инграм (Њу Орлеанс) и Џерен Џексон јуниор (Мемфис). Крилниот кошаркар на Орландо, Паоло Банчеро, исто така е дел од американската репрезентација.
Преостанатите имиња на списокот на селекторот Кер се Џален Брансон (Њујорк), Остин Ривс (ЛА Лејкерс), Микал Бриџс (Бруклин), Џош Харт (Њујорк), Камерон Џонсон (Бруклин), како и Вокер Кеслер (Јута) и Боби Портис (Милвоки).
Уверен сум дека оваа група играчи добро ќе ја претстави нашата земја, со работа, талент и посветеност за заедничка победа, рече Кер, кој изрази уверување дека петкратниот светски првак „ќе игра за златниот медал“ на претстојното Светско првенство, кое од 25 август до 10 септември ќе го организираат Јапонија, Филипини и Индонезија.
