Студентката Олесја Кривчова постирала објави на социјалните мрежи за војната во Украина. Сега може да излезе од дома само за да дојде на суд. Олесја пропушти голем дел од наставата, затоа што оваа 20-годишна девојка е во домашен притвор. Таа има електронска алка на ногата за полицијата да може да го следи секое нејзино движење.
Кое е нејзиното наводно кривично дело? Олесја беше уапсена поради антивоени објави на социјалните мрежи. Една од нив се однесуваше на експлозијата во октомври минатата година на мостот што ја поврзува Русија со анектираниот Крим. „Објавив приказна за мостот на Инстаграм“, вели Олесја за Би-би-си, размислувајќи за тоа колку Украинците биле среќни за тоа што се случи кога дел од мостот беше оштетен во експлозијата.
Таа сподели и објава од еден нејзин пријател за војната. Тогаш започнала драмата.
„Разговарав на телефон со мајка ми“, се сеќава Олесја, „кога слушнав како се отвора влезната врата. Влегоа многу полицајци. Ми го зедоа телефонот и ми викаа да легнам на подот“, вели оваа 20-годишна девојка.
Олесја е обвинета за оправдување тероризам и дискредитација на руските вооружени сили. Таа се соочува со затворска казна до 10 години.
„Никогаш не ни замислував дека некој може да добие толку долга затворска казна за објавување нешто на интернет“, вели Олесја. „Видов извештаи за луди пресуди во Русија, но не им обрнав многу внимание и продолжив да зборувам“, вели таа.
Студентка на Северниот федерален универзитет во Архангелск, Олесија сега е додадена на официјалната руска листа на терористи и екстремисти.
„Кога сфатив дека сум ставена на истата листа со вооружените насилници во училиштата или Исламската држава, помислив дека тоа е лудо“, се сеќава Олесја. Според правилата за куќен притвор забрането ѝ е да зборува на телефон и да се поврзува на интернет.
