Тричасовна воздушна тревога во украинскиот главен град. Руските сили извршиле напад со беспилотни летала врз Киев. Во гранатирањето на Херсон оштетена е црква, има повредени. Од друга страна, Москва тврди дека собориле шест украински беспилотни летала над регионот Калушка.
„Во шест часот наутро покривот почна да чади, имаше силни звуци, како истрели. Сите побрзаа кон подрумот. Пожарникарите се искачија на покривот да ги спасат опожарените дрвени конструкции“, вели жителка на Керсон.
За нападите врз Киев, Одеса и други региони, украинскиот претседател вели дека секој удар е проблем за светот, а руските напади ја загрозуваат стабилноста.
„Постигнавме исклучително значајни резултати во снабдувањето со оружје за нашите војници. Има моќни санкции против Русија. Сега нашите дипломати имаат за цел да привлечат одбранбено производство во Украина, опрема, артилерија, гранати“, изјави украинскиот претседател, Володимир Зеленски.
Високиот претставник на ЕУ за надворешна политика и безбедност, Борел, предупредува дека Русија ја користи храната како оружје откако беа извршени напади врз инфраструктура во Одеса. Државната гранична служба на Украина објави видеоснимка на која наводно се гледа вчерашното соборување на дронови „Шахед“, во регионот на Дунав.
„Добивме предупредување за воздушен напад. Отидовме до нашите назначени позиции за гаѓање и го чекавме приближувањето на непријателските беспилотни летала, врз основа на очигледни звучни и визуелни знаци. Откриени се две непријателски цели и отворен оган, при што е уништен еден премин“, изјави украински граничен чувар.
Според украинските власти, руските сили не напредувале по должина на линијата на фронтот, туку се позиционирани во минирани области, што го отежнува движењето на украинските војници на исток и југ.
