Врнежите од дожд ја пролонгираа планираната акција за прскање против комарци. Општина Свети Николе е една од ретките каде во текот на летниот период ќе се прска авионски и тоа 6 пати.
– Се работи за мали авиони кои можат доста ниско да летаат над земјата. По консултациите што ги имавме со стручни луѓе за оваа област, добивме информација дека е најдобро такво прскање, бидејќи ги опфаќаат сите легла на комарци- изјави Дејан Владев, градоначалник на Свети Николе.
Локалните самоуправи, секоја поединечно ќе се справува со овој проблем, зашто и годинава не успеа да се изнајде регионално решение. Помалите општини поради наталожените долгови, немаат средства за оваа намена, а повторно изостана финансиската поддршка од централно ниво.
– Жалам што ефектот ќе биде минимален, но ние мораме да си ја завршиме нашата обврска. Од друга страна, ако не го спроведеме ова како активност, ќе имаме дополнител проблем и одговорност како локална самоуправа. Затоа, апелиравме до надлежните, до централната власт, да се вклучи во оваа постапка, да сите региони и сите локални самоуправи кои не се ликвидни, а имаат поголеми површини, да бидат финансирани преку ресорните министерства за да имаме ефект од постапката за прскање и третирање против комарци и ларвициди- изјави Иван Јорданов, градоначалник на Штип.
Просечно, поголемите ликвидни општини од источниот регион издвојуваат по 2 милиони денари од општинските буџети за прскање против комарци.
