23.8 C
Skopje
Friday, June 18, 2021

Опозицијата во Словенија побара гласање за недоверба на Владата

Најчитани вести

Пет словенечки опозициски партии вчера доставија предлог до Парламентот за изгласување на недоверба на Владата на Јанез Јанша и именување на лидерот на ДЕСУС, Карл Ерјавец за мандатар на нова влада.

Според Уставот на Словенија, постпката е изрекување на „конструктивна недоверба“ на Владата, со формирање на ново парламентарно мнозинство со нов премиер, додека Владата во оставка до формирање на нова ги извршува тековните работи.

– Актуелната Влада, посебно премиерот Јанез Јанша, ги нарушуваат основните уставни начела и ги ослабнуваат механизмите за надзор, изјави лидерот на Демократската партија на пензионерите (ДЕСУС), Ерјавец.

Тој додаде дека целта на Јанша и неговата Словенечка демократска партија (СДП) е воспоставување на „авторитарна демократија“ во Словенија.

Ерјавец во изминатите 15 години беше министер во повеќе коалициски влади, меѓу кои и во претходните влади на Јанша, беше министер за одбрана и за надворешни работи.

Опозициските лидери истакнуваат дека Владата на Јанша лошо се справува со епидемијата со Ковид-19, и нанесува штета на државата оти со надворешно политичките потези се оддалечува од либерално-демократското јадро на Европска Унија и ги крши начелата на владеење на правото. Исто така Јанша и Владата ги обвинуваат за поделба на словенечкото општество и напади врз независните медиуми.

По доставувањето на предлогот претседателот на Парламентот е должен да закаже вонредна седница на која ќе се дебатира и ќе се гласа за недоверба на Владата. Седницата може да биде закажана на почеток на следната недела.

Предлогот го поднесоа опозициските партии – Коалиција за уставен поредок (КУЛ), Социјалните демократи (СД), Листата на Марјан Шарец (ЛМШ), ПАртијата на Аленка Братушек (САБ) и партијата Левица (Л).

Повеќе вести

- Advertisement -spot_img

Најнови вести