Управата на ФК ДЕТОНИТ ПЛАЧКОВИЦА со задоволство ја изразува својата благодарност до генералниот спонзор – фирмата „ДЕТОНИТ“ и компанијата „ТРАЈАЛ“ од Крушевац и секако до Градоначалникот и Советот на општина Радовиш за досегашната и идната поддршка.
Особено сме горди што покрај поддршката на Фудбалскиот клуб, добивме и директна поддршка за обнова на спортската инфраструктура и поставување на ново фудбалско игралиште со вештачка трева.
Ова е сериозен приоритет за нас и за нашата општина во делот на омасовување на активноста на младите спортисти – фудбалери, градење на нови генерации фудбалери со кои ќе се гордееме сите и продолжување на традицијата на Радовиш како успешен фудбалски град. Особено се радуваме и на тоа што тројца наши млади фудбалери веќе беа на тест-подготовки во Крушевац и има иницијатива од нашите пријатели Ф.К.„Трајал“ за нивен професионален ангажман.
Драги пријатели, ние нема да застанеме тука. Во најблизок период очекуваме позитивна вест и од Фудбалската федерација на Македонија и Агенцијата за млади и спорт за обнова на постоечката тревна површина на градскиот стадион како и обнова на помошниот стадион во Раклиш. Со тоа практично ќе ја заокружиме инфраструктурата и ќе добиеме идеални услови за тренинзи на сениорските и младинските категории, како и можност за натпреварување во повеќе категории, што е на задоволство на сите љубители на фудбалот.
Нашата цел и оваа година е една и единствена – влез во првата Македонска лига и очекуваме целосна поддршка од граѓаните со цел заеднички да придонесеме да уживаме во најважната споредна работа во животот – фудбалот.
