Странските воени сили на Косово предводени од НАТО (Кфор) ја предупредија денес Приштина по купувањето турски вооружени дронови дека само тие се одговорни за косовскиот воздушен простор. Оваа изјава на Кфор доаѓа по веста за набавката на турски дронови ТБ-2 „бајрактар“, која ја објави премиерот Аљбин Курти.
„Кога станува збор за сите видови беспилотни летала и соодветните ограничувања, па и во врска со ТБ-2 „бајрактар“, Кфор ја има главната одговорност за воздушниот простор на Косово“, се наведува во соопштението.
Курти во неделата на социјалните мрежи објави фотографии на кои стои покрај новите дронови.
„На нашиот арсенал додадовме дронови ТБ-2 „бајрактар“ кои ги купивме од Турција“, со задоволство изјави Аљбин Курти додавајќи: „Косово сега е побезбедно и подеднакво гордо“.
За „барјактар“ поприлично се пишуваше минатата година поради неговата улога во конфликтот во Украина, а го набавија десетина војски, пишува Меѓународниот институт за стратегиски студии.
Косовската влада се обидува да ги трансформира косовските безбедносни сили, лесно вооружени сили, во регуларна војска.
