Педофилот, силувач и поранешен фронтмен на Лостпрофетс (Lostprophets), Иан Воткинс, е во критична состојба во болница, откако тројца затвореници го држеле како заложник шест часа и го прободеле во вратот.
Затворениците во машкиот затвор Вејкфилд наводно го зеле 46-годишниот Воткинс како заложник пред брутално да го претепаат и избодат.
Изворите тврдат дека Воткинс имал „мета на грбот“ и бил нападнат во саботата затоа што затворениците чекале ден со помалку присутен персонал.
Ситуацијата ескалирала толку многу што службениците во затворот морале да чекаат вооружен тим „Торнадо“ од специјално обучени полицајци за немири за да ја разбијат заложничката ситуација.
Тие фрлиле шок-бомби во ќелијата за да го ослободат Воткинс од другите затвореници откако упаднале во крилото на затворот. Според странските медиуми, осудениот педофил врескал од страв за својот живот, а целото крило на затворот во Западен Јоркшир брзо било затворено.
Нападот, кој започнал околу девет часот во саботата, траел шест часа, додека полицијата не го ослободила Воткинс. Друг извор изјави за „Мирор“ дека Воткинс бил претепан пред да биде избоден и дека болничарите биле видени надвор од затворот како му даваат медицинска помош за да му го спасат животот.
Да потсетиме, поранешниот рокер во 2013 година беше осуден на 35 години затвор за 13 злосторства врз деца, меѓу кои и обид за силување на 11-месечно бебе. Тој, исто така, призна заговор за силување дете, три точки за сексуална злоупотреба на деца, седум точки за правење или поседување непристојни слики на деца и една точка за поседување екстремна порнографска фотографија со сексуален чин врз животно.
