Москва одново била нападната со две беспилотни летала. Руските власти тврдат дека противвоздушната одбрана навреме ги пресретнала. Претходно, украинските власти ги обвинија силите на Кремљ дека гранатирале спасувачи во станбени згради со два последователни проектили. Според Киев, првиот напад бил за да ги привлече спасувачите на местото на настанот, а вториот да ги рани или убие.
„По ракетниот напад на руските терористи загинаа девет лица. Осумдесет и двајца се ранети. На сите им се обезбедува потребната помош. Меѓу повредените има и две деца, од кои едното е во критична состојба. Им посакувам брзо закрепнување на сите оние кои настрадаа од овој последен чин на руско предавство“, изјави украинскиот претседател, Володимир Зеленски.
Зеленски рече дека разговарал за нови одбранбени пакети со холандскиот премиер Марк Руте, вклучувајќи ја и можноста за обезбедување на Киев со борбени авиони Ф-16.
