Лицата со попреченост ќе имаат можност полесно да дојдат до јавни информации. Проектот кој ќе започне да го реализира здружението Инклузива од Куманово ќе има за цел да го зголеми бројот на едуцирани потенцијални баратели. Целта е да се обучи општинската администрација за поддршка и остварување на ова право, односно да ја зголеми пристапноста на веб страниците на три општини.
„Проектот ќе почне на 1 август годинава, иако веќе е потпишан договорот. Ќе работиме во три града Дојран, Гостивар и Прилеп со тамошните општини. Предвидени се обуки за локална администрација, за подготовка на документација пристапна за сите граѓани и комуникација со лица со попреченост“, изјави Благица Димитровска од „Инклузив.
Како што појаснуваат од Инклузива голем број од општините имаат назначено лице за комуникација со граѓаните со попреченост. Но истите не посетувале обуки. Проектот ќе се реализира заедно со Агенцијата за заштита на правата за слободен пристап до информации од јавен карактер. Ќе се изготви и прирачник на лесно разбирлив јазик. Општините Куманово и Крива Паланка веќе ги адаптираа веб страниците и за лицата со попреченост. Здружението реализира и обуки за активно и успешно политичко учество и лидерство, еднакво учество во донесување на одлуки на државно и локално ниво за граѓаните со попреченост. Опфатени се лица кои се слепи, глуви, како и граѓани со телесна и со интелектуална и попреченост.
