“Кога имаме јас и Ромео наша нова песна, оставаме прво Пако да ја слушне“
Мегапопуларната македонска поп-пејачка, Калиопи, секогаш со раширени раце и со голема срдечност е пречекана во Белград, каде што има голем број свои обожаватели. Така беше и неодамна, кога настапи во балканското ТВ-шоу „Никад није касно“. За српската престолнина, таа има само најубави зборови:
– Секогаш доживувам ново искуство со белграѓани, секогаш се прашувам што е тоа ново што може да ме изненади во Белград. А, секогаш има нешто со што ме изненадува градот на реките Дунав и Сава. Кога ќе ме видат на улица во Белград, во ресторан, на шопинг, луѓето реагираат многу спонтано. Ме гушкаат и ми се обраќаат со „ти“, како да сум 100 години нивна, како отсекогаш да се познаваме. Тоа најмногу ме прави да сум среќна. Јас не можам за ништо да им се налутам на белграѓани. И тогаш кога ме прашуваат за мојата приватност, за мојот син Пако.
Него Калиопи, својот син, најмногу од сите го сака!
А, вистина е дека Пако е еден од главните нејзини критичари, некој што е многу важен за неа и за неговиот татко, Ромео Грил.
– Иако одлучи да не се занимава со музика, Пако многу добро ја слуша, доживува и препознава што е добро, а што не е. Кога имаме јас и Ромео наша нова песна, оставаме прво тој да ја слушне – открива оваа омилена пејачка, која воедно објаснува дека сè уште не е јасно дали „и Пако ќе биде пејач или композитор“.
– Најважно е детето да ми е среќно, да прави во работата тоа што го исполнува – искрена е, како и секогаш, (летно) разубавената Калиопи.
