Поранешните владини функционери учествуваа на самитот во Анталија каде Македонија имаше и официјална делегација.
Според ТВ 21, присуството на поранешниот премиер Зоран Заев на дипломатскиот форум на Анталија е поврзана со неговата идеја да формира фондација „Едно општество за сите“. Заев и претходно неколкупати најави дека по заминување во политичка пензија ќе се посвети на лична фондација.
Името „Едно општество за сите“ е земено од предизборниот концепт на СДСМ во 2017-та година. Партијата засега не се изјаснува што мисли за „позајмувањето“ на сопствените партиски кованици и концепти.
Она што се знае, согласно фотографиите и видеата кои беа лиферувани од овој дипломатски форум, е дека на Заев му правел друштво поранешниот министер за здравство Венко Филипче, кој истовремено со партискиот лидер ја напушти и СДСМ и владата. На форумот беше и министерот за надворешни работи Бујар Османи, но никој не објави заедничка фотографија од двајцата (Заев и Османи), па не е јавно откриено дали се сретнале на брегот на Средоземното Море.
Дипломатскиот форум сепак го одбележа директната средба на украинскиот и рускиот министер за надворешни работи Кулеба и Лавров, со посредство на турскиот домаќин Чавушоглу. Таа се одржа на почетокот на форумот кој траеше од 11. до 13. март.
