Европската унија ја вклучи Русија во листата земји кои важат за даночни раеви, се вели во денешното соопштение на Советот на ЕУ.
„Денеска одлучивме да додадеме четири јурисдикции на списокот на ЕУ за даночни цели кои не соработуваат: Британските Девствени Острови, Костарика, Маршалските Острови и Русија. Бараме од сите споменати земји да ја подобрат својата законска рамка и да работат на усогласување со меѓународните стандарди во оданочувањето“, изјави министерката за финансии на Шведска Елизабет Свантесон.
Русија е на списокот откако групата за кодекс на однесување на ЕУ ги разгледа руските закони усвоени во 2022 година против критериумите за добро даночно управување и откри дека Русија не успеала да одговори на штетните аспекти на специјалниот режим за меѓународните холдинг компании, се вели на веб-страницата на Советот на ЕУ.
Дијалогот со Русија за прашања поврзани со даноците, наводно, престанал по почетокот на војната во Украина.
