Ѕвездата се врати на својата музичка кариера среде штрајкот на актерите. Тој повторно се приклучи на членовите на групата Dogstar, која ја основа во 1991 година како бас гитарист и придружен вокал.
Кијану Ривс ја формираше групата Dogstar со Роберт Меилхаус, кого го запознал во самопослуга и се зближиле поради хокејот, а подоцна им се придружија и Брет Домроуз и Грег Милер. Активни беа од 1991 до 2002 година, а покрај бројните концерти, издадоа едно ЕП „Quattro Formaggi“ од 1996 година и два албума – „Our Little Visionary“ исто така од 1996 година и „Happy Ending“ од 2000 година.
Меѓу другите беа на турнеја и со Бон Џови, а отворија концерт и за Дејвид Боуви. Како што актерот стануваше сè позафатен и славен, му беше тешко да балансира помеѓу филмот и музиката, па во 2002 година го напушти бендот, кој потоа се распадна. Подоцна свиреше со Мејлхаус во бендот Becky, но и ги напушти по една година.
По пауза, Dogstar повторно се обедини за музичкиот фестивал BottleRock Napa Valley овој мај, а во вторникот го отсвиреа својот концерт во The Roxy во Лос Анџелес.
Таму тие премиерно го изведоа својот нов сингл „Everything Turns Around“, најавувајќи го нивниот нов албум Somewhere Between the Power Lines and Palm Trees, кој треба да биде објавен на 6 октомври преку сопствената продукциска куќа на Dogstar, Dillon Street.
За насловниот сингл рекоа дека „има возбудлива порака и позитивна атмосфера“ и дека „тоа е една од нивните омилени песни за свирење во живо“. Dogstar исто така планира турнеја од 25 шоуа во Северна Америка и Јапонија.
