Милан и Монца вчера се сретнаа во првото издание на „Трофеј Силвио Берлускони“, во соседско дерби посветено на неодамна починатиот Силвио Берлускони, кој во својот долг фудбалски ангажман, беше прв човек на двата клуба.
Двете екипи имаа можност со подновените состави да видат до каде се во финишот на подготовките за новата сезона, но пријателската атмосфера меѓу членовите на ривалите од Серија А беше нарушена во еден момент од средбата.
Во главна улога беа довчерашните играчи на Интер, Галјардини и Д’Амброзио кои за само неколку секунди предизвикаа нервоза на теренот и најмногу кај Рафаел Леао.
Најпрвин Д’Амброзио имаше погруб контакт со Тео Ернандес кој остана на тревата и се жалеше на повреда, за Галјардини да има близок контакт со Леао, по што и настана тензијата која беше смирувана од другите фудбалери.
