И утрово во Скопје повторно можат да се забележат преполни контејнери по скопските улици од кои се шири лош мирис откако службите на градското претпријатие Комунална хигиена – Скопје неколку дена, во протест, одбиваа да ги празнат контејнерите.
Дел од градоначалниците на скопските општини вчера соопштија дека се самоорганизирале за чистење на ѓубрето. За денеска е најавен состанок на градоначалниците од Скопскиот плански регион, кои ќе излезат со свој став за настанатата состојба. Градоначалниците на Аеродром и Кисела Вода, Тимчо Муцунски и Орце Ѓорѓиевски вчера најавија дека сами ќе започнат со чистење на отпадот. Доцна синоќа, по седница на Кризниот штаб, градоначалничката Данела Арсовска кажа дека Комунална хигиена е ставена во нормала и оти се надева дека од денеска ќе почне да работи со целосен капацитет.
