Home » Ана Бунтеска: Колку има од тебе до мене?

Ана Бунтеска: Колку има од тебе до мене?

by Журнал.мк

Од тебе до мене само една мисла има

Која прелетува напукнати насмевки

И неосетно во мојот црно бел свет боја истура

Ко мома убава да заличи

Да светне и со срма да се накити

Од тебе (драги мој)

До мојата воздишка

Има само една нишка

По која мислата ми чекори

Внимателно и вешто

Како изведувач во циркус

Кој по тенката жица се движи

А ти заедно со цела публика

Дишењето го запираш додека угоре се пулиш

Од страв дека едно издишување

Може да го наруши совршениот баланс

Ете токму така

Занемено мислата ми ја следиш

И ме оставаш да ти зборувам

Без ниту еден збор да изустам

Од тебе…до мене

Ех

Од тебе до мене душо моја

Само еден удар од срцето има

Кога во твоето ТИК

Моето ТАК ќе се најде

Та некогаш моево знае и да подзабави

Само за да те почека и заедно да баботат

Без страв дека може без здив да ме остави

Дур со наивност на дете му верувам

Дека точно знае што прави

Та го оставам без да го трујам со сомнежи

Од тебе

Од тебе до мене планини разочарувања има

Твои болки и мои падови

А јас пак како дете сум

Инаетлива

Решена да го изодам сиот пат

Со главата низ ѕидови да минам

И мевлем облози на твоите оболени места да ставам

Да те зацелам

За да можам и јас да оздравам

Чунки од иста болест боледуваме

Од тебе пиле мое

Од тебе до љубовта моја

Ниту време ниту простор има

Освен мојата дланка отворена и треперлива

Полна зборови и думи

Од мене…до тебе…за тебе

You may also like

This website uses cookies to improve your experience. We'll assume you're ok with this, but you can opt-out if you wish. Accept Read More

About Us

Журнал МК е независен информативен портал.

Адреса: 8 Ударна Бригада 20б, Скопје, МК
Телефон: + 389 2 3217 815
Email: info @ zurnal.mk

@2022 – All Right Reserved. Designed and Developed by Anet.com.mk